Meistaramót 2019 – myndir

Meistaramót

Meistaramót Dalbúa var haldið í blíðskaparveðri og góðum félagsskap! Klúbbmeistarar þetta árið eru hjónin Böðvar Þórisson og Petrína Freyja Sigurðardóttir. Óskum við þeim innilega til hamingju með titlana.

Golfnámskeið – Golfnámskeið ⛳️

Golfklúbburinn Dalbúi í Miðdal verður með golfnámskeið fyrir börn í sumar. Námskeiðið verður í tvo daga, laugardaginn 13. júlí klukkan 10.00 – 13.00 og sunnudaginn 14 .júlí klukkan 10.00- 13.00. Seinni daginn verður mót hjá þátttakendum þar sem spilaðar verða 4 holur.

Verð: 2.000.- Innifalið í námskeiðinu er nesti og grillaðar pylsur á lokadeginum.

Þeir sem eiga golfkylfur mega gjarnan koma með þær en golfklúbburinn á nokkur barna golfsett sem hægt er að fá lánuð.

Munið að koma klædd eftir veðri 😊

Kennari á námskeiðinu er Anna Día Erlingsdóttir, íþróttakennari og reyndur golfleiðbeinandi.

Nánari upplýsingar og skráning hjá Bryndísi Scheving, formanni GD í síma 8628995 eða á netfanginu: bryndisscheving@gmail.com

Jónsmessumót 2019 – úrslit

Sigurverar Jónsmessumóts Dalbúa 2019

Jónsmessumót GD fór fram í blíðskaparveðri 22. júní, og lék góður hópur félagsmanna og gesta 18 holur eftir Greensome-fyrirkomulagi.

Reyndist mótið hin besta skemmtun fyrir þátttakendur, sem nutu sín vel við góðar aðstæður, þar sem völlurinn var í prýðilegu standi, og veðrið hlýtt og gott.

Sigurvegarar í mótinu voru þeir Oddgeir Sæmundsson og Ragnar Þórisson; í öðru sæti Guðríður Pálsdóttir og Viktor S. Guðbjörnsson; í þriðja sæti Hlöðver Jóhannsson og Jónína Jónsdóttir. Þeir Oddgeir og Ragnar hlutu m.a. í verðlaun veglega skildi sem Hrafn Jónsson, félagsmaður GD, hafði hannað sérstaklega fyrir mótið.

Jónsmessumót

Laugardagur 22. júní

Fyrirkomulag Greensome -18 holur.
Það er komið að hinu stórskemmtilega Jónsmessumóti Dalbúa. Við bregðum út af vananum að þessu sinni og spilum 18 holu Greensome. Þetta er skemmtilegur og léttur leikur sem fer þannig fram að tveir spila saman í liði, báðir slá upphafshögg og er betri boltinn leikinn. Sá sem átti verri boltann í upphafshögginu slær betri boltann, við næsta högg slær sá sem átti betri boltann í upphafi og svo koll af kolli. Þetta er hraður leikur en fjörugur.

Við lofum skemmtilegu móti í frábærum félagsskap!
Ræst verður út af öllum teigum stundvíslega klukkan 10.
ATH: Keppendur sem vilja spila saman í holli eru beðnir um að skrá sig saman á rástíma en munið að rástíminn er einungis til skráningar.
Skráning á golf.is
Verð: 3.000.-

Sól og gleði

Hér er 12 stiga hiti enn sem komið er og fer hækkandi. Völlurinn alveg frábær og kátir kylfingar að leika sér. Verið velkomin 😁

Opnum inn á flatir

Búið er að slá völlinn og verður opnað inn á flatirnar á morgun. Völlurinn skartar sínu fegursta og veðrið alveg ágætt. Spáin er fín fyrir helgina, hlýtt og þurrt.

Verið velkomin, heitt á könnunni og kalt í kælinum!

Gleðilegt sumar! – Vinnudagur framundan.

Ágætu Dalbúar, gleðilegt sumar!

Það styttist í opnun vallarins og verður að segjast eins og er að völlurinn kemur mjög vel undan vetri. Það er hvergi kalblettur sjáanlegur sem er talsvert annað en síðastliðið vor. Undanfarna daga hefur völlurinn grænkað dag frá degi. Það er því mikið tilhlökkunarefni hjá okkur fyrir komandi golfsumri og sérstaklega í ljósi þess að við eigum 30 ára afmæli núna í sumar.

Eyjólfur og Anthony er nú þegar byrjaðir að gera og græja eitt og annað á vellinum og er þar helst að nefna stækkun á 9.flöt, en þeir eru langt komnir með þá framkvæmd. Um þessa helgi verður farið í það að sá grasfræjum í flatir og bera áburð á flatir og brautir.

En það eru mörg handtökin framundan hjá okkur og viljum við því biðla til sem flestra félagsmanna sem sjá sér fært að mæta á vinnudag laugardaginn 4.maí. Við stefnum á að byrja á verkefnunum milli 11.30 og 12.00 og er vallarnefndin búin að útbúa verkefnalista fyrir okkur þannig að engum ætti að leiðast 😊

Það verður hressing í boði að vinnudegi loknum og ekki úr vegi að einhverjir kjósi að taka eins og einn golfhring að honum loknum. 

Hlökkum til að sjá sem flesta!

Kveðja, stjórnin.

Fréttir af klúbbnum

Ágætu Dalbúar,

Nú fer nýtt golfsumar að nálgast, þrátt fyrir risjótta tíð um stundir, og því vert að huga að því sem framundan er hjá klúbbnum okkar.

Það ber auðvitað hæst að á þessu sumri verða þrjátíu ár liðin frá því að klúbburinn okkar var stofnaður, og er fyrirhugað að halda upp á þau tímamót með ýmsum hætti. Þá eru ýmsar framkvæmdir í bígerð; nú er hafinn undirbúningur að stækkun á flötinni á 9. braut, þá er fyrirhugað að breyta upphafshluta 1. brautar þannig að hún verði að hluta leikin í brekkunni neðan núverandi brautarstæðis. Einnig er stefnt að því að allur kargi milli brauta verði sleginn niður í leikhæð, sem ekki hefur verið reyndin síðustu ár. Loks er fyrirhugað að sameina flatir 4. og 7. brautar, sem liggja nánast saman, og gera þannig stóra tvöfalda flöt fyrir báðar brautirnar, líkt og sjá má á ýmsum golfvöllum.

Á síðasta ári voru kynntar hugmyndir um tvöföldun teiga á öllum brautum þannig að hægt yrði að leika völlinn sem 18 holu völl (sbr. tvöfalda teiga á Setbergsvelli í Hafnarfirði). Að loknu sumri komst stjórn og aðalfundur þó að þeirri niðurstöðu að fresta yrði slíkum verkefnum því mikilvægasta fjárfesting þessa árs yrði að vera í nýrri kargasláttuvél, þar sem sú sem hefur verið notuð var á síðasta snúning sumarið sem leið. Nú er unnið að kaupum slíkrar vélar, og stefnt að því að hún verði komin í þjónustu klúbbsins fyrir vorið.

Allir sem léku völlinn á síðast sumri voru sammála um að þrátt fyrir erfiðan vetur og vor hafi tekist að koma vellinum í mjög gott form, einkum þegar leið á sumarið, og vöxtur tók við sér eftir hart vor. Mikil ánægja var með umsjón Anthony Karls Flores og félaga hans, einkum Eyjólfs Óla Jónssonar, með vellinum á liðnu ári, og mikið fagnaðarefni að hann mun halda áfram að hafa umsjón með vellinum á komandi sumri.

– Þá mun ég undirrituð halda áfram að annast rekstur skálans líkt og síðasta sumar, og hlakka til að sjá ykkur í Miðdal og þiggja kaffisopa fyrir eða eftir góðan hring á vellinum.  

Rekstrarstaða klúbbsins hefur verið þröng undanfarin ár, en batnaði nokkuð á síðasta ári, og hefur klúbburinn því átt fyrir útgjöldum vetrarins (hita- og rafmagnskostnaði o.fl.) og til undirbúnings vorverkanna. Í ljósi stöðunnar var ákveðið á aðalfundi Dalbúa 29. nóvember sl. að hafa félagsgjöldin á þessu afmælisári óbreytt frá liðnu ári. Sjá má hver gjöldin eru inn á vefsíðu klúbbsins (www.dalbui.is), en gjaldið fer eftir þeim leiðum sem valdar eru (almennt félagsgjald, hjónagjald o.s.frv.). Innheimtan verður með sama sniði og á síðasta ári, og verða gjalddagar nú þrír og dreifast á 1. apríl, 1. maí og 20. maí. Verða greiðsluseðlar vegna félagsgjaldsins settir inn í heimabanka félaga í Dalbúa á næstunni, og er miðað við gjöld síðasta árs við niðurröðun, t.d. að tekið sé tillit til þess þegar félagar eru með annan golfklúbb sem aðalklúbb. Ef einhverjar misfellur verða á þessu er félögum bent á að snúa sér til gjaldkera, Eiríks Þorlákssonar (thorlakssone@gmail.com) og verður greiðsla síðasta gjalddaga þá leiðrétt eins og við á.

Í ljósi reynslu síðustu ára og þess að um afmælisár er að ræða stefnir stjórnin að því að golfmót sumarsins verði með örlítið breyttu sniði og vonandi „félagavænni“. Rætt hefur verið um að breyta fyrirkomulagi einhverra móta, en sú hugmynd hefur m.a. komið upp að hafa sum þeirrra 9-13 holu mót. Félagar hafa verið að kalla eftir fjölbreyttara fyrirkomulagi og getur það orðið skemmtileg nýbreytni hjá okkur.

Þá ber að nefna að endurskoðaðar golfreglur gengu í gildi 1. janúar 2019, og fela þær í sér talsverðar breytingar frá því sem verið hefur, eins og mörg ykkar hafið eflaust tekið eftir. Stefnt er að því að bjóða upp á fræðslufund eða námskeið fyrir félagsmenn vegna hinna nýju reglna við upphaf golfsumarsins, og verður það kynnt nánar síðar.

Ég hlakka til að starfa með ykkur á komandi afmælisári og hvet ykkur til að láta í ykkur heyra; nú þegar vetur er að síga á seinni hlutann má reikna með að margir séu farnir að hugsa sér til hreyfings og munda kylfurnar að nýju.

Kær kveðja,
Bryndís Scheving
formaður stjórnar.